مُر وكتي بعد ما چان حالاي
وسيل النزل بالدار حالاي
تعال انت يحمدي وشوف حالاي
وشوف النايبه الحلت عليه
ابو معيشي - سوق الشيوخ
حادي البين وين يريد حده
اخذ مني اليجزي الخصم حده
يشامت حيل سيفك علي حده
طريح وصح الك معراض بيه
ملا نعيم - الحي
علي صنف جيوشه الدهر وحدات
ولجل چتلي سيوف اسكرت وحدات
مدام اضعون اهلنه سرت وحدات
بگالنه بدارهم ذله واذيه
روحي خلافكم محد حملها
نشيطه ونهضت وشالت حملها
راح الچان بالكلفه حملها
وگطع بيها الزمان وخان بيه
احا بيوم المفارگ وعلمه
من اذكرنه ايطيح من چفي واعلمه
اليناشدني شگله وشراح اعلمه
اختنگ وحجايتي تصعب عليه
عفاني شلون الي مهجه والي روح
اداوي بالعلل كلها واليروح
لااني بحال من يبگه واليروح
ابحالك يلگطعت الوصل بيه
السوگ
عليك الروح ما يبطل ولمها
وغيرك بعد ما تلگه ولمها
اريد اجمع دموع الحب ولمها
وطفي النار البگلبي السريه
يدكتور ما تجس روحي شبيها
ولهيب النار بجفاهم شبيها
ابد ما ياجد لولفي شبيها
يهل دمعه ويگلي البيك بيه
صديج اللي توده مرعلينا
اجه والگه وكتنه مُر علينا
مره النه الليالي ومرعلينا
يگلبي لا تجيك المهضميه
اوجه دعوتي لربي مردها
طالت والقهر روحي مردها
اظعون الساگها الحادي مردها
تگفاها نذل وشلون بيه
كل ساعه بسهم روحي خللها
وهسه انكشف للشامت خللها
امس چان البنادكها خللها
اليوم اتنادم على الشجيه
چثير اصحاب اللي عديت واخوان
كل منهم جمره الدهر واخوان
ليالينا الجفن للغير واخوان
وانه بسهم الردى يرمن عليه
عبد الحسين حميدي شطره
وحك من نزل القران ونده
وروحي من ليالي العسر ونده
اريد امشي لداحي الباب ونده
بلكي يعودلي الغايب عليه
ايا عمري الگظه ولا شفت راحات
اعظ بشفاي حيل صفگت راحات
افراح الماحسبت تروح راحات
اجتني الماردتهه بسهم المنيه
جواد كاظم - شطره
العبره مكسره والدمع ماسال
جلد والحد مني دوم ماسال
اخوي اليوم زلت الوكت ماسال
مته ينفع اگولن اخو ليه
عادل صغير - شطره
روحي من جفاكم عله بيهه
شور اليسري عليكم عله بيها
ونخيت انه الاهي عله بيها
يحفظولي العزيز من الاذيه
نفسه
اون ولا نمت بالليل ساعه
بسبب همي بجميع اعظاي ساعه
وحدي اولا اخو الوياي ساعه
حتى ابني جفاني وشح عليه
الاحواز
ملوني الاهل من نوحي واليناب
اصيح ولا اخو الجاوب واليناب
العليهم چنت الي شرها واليناب
همه والدهر صاروا عليه
الاحواز
يشيال النعش بالنعش وني
اخوي واريده يسمع زين وني
الناس امعيده بالعيد وني
على ابن امي اظل انصب عزيه
الاحواز
يعاذل لا تعذل النفس خلها
ويعلها تموت بعد فراگ خلها
لزم ايدي الطبيب وصحت خلها
المرض وسط الگلب ماهو بديه
صعوبه لو جبان عليك يوله
يدوس ويلعب اعلى جلاك يوله
الدنيه لو معزه وشرف يوله
لو موت اليخلصك جيد نيه