[size=29]عنوان القصيده يمضون و نبقى
الاشخاص
تونه:ابنت عمتي توفشت و عمرها سنتان من قبل ارهابيين
خوله :عمتي والده تونه
عمر:ابن خالتي توفي على ايادي الارهابيين و عمره عشرين سنه
رزاق:والد عمر توفي قبل ولده على مجموعه ارهابيه
حيدر:عمي توفي في حادث تسليب
جاسم:خال ابي توفي في رصاصات الارهابيين اثناء تاديه الواجب
يمضووون ونبقى
جنه بعوز وحصار الياكل الروح ونخاف نحجي تسمعنه الحياطين...
هذا انعدم وذاك اخذوه واعله ضيم الناس ساكته سنين....
انخاف نحجي ينكص السان لو نبقه مسجونين....
تبدل الحال وحجينه بس اجو طرشان حطوا كطن بالاذنين....
اجونه وكالوا كمره وربيع العراق يصير وجنه ورياحين....
بطل ببسي بيد كل الناس منظر غريب اعله العراقيين....
وصحن دش تتراكض اعليه الكل وحيل بيه مكيفين....
انطونه التوافه للاسف اعله طيبتنه انخدعنه شوا احنه طيبين....
اخذوا كلشي حلو منه واختاروا كل الزين....
اخذوا لمتنه.الفرح.راحه البال.بيوتنه وقره العين....
وعرفنه ومايضل شي مضموم وآخ شكثر ياربي مخدوعين....
وطلعوا دعايه تكول يمضووووون ونبقى وبالدعايه اطفال حلوين....
لكن للاسف شو احنه المضينه وهمه باقين....
اي همه البقوا واحنه صرنه ماضين....
جم عمر زفينه وجفن قاط العرس صاروبدمه متحنينين....
ونوح لطم مو هلهوله هذا الصار واهل الزفه صاروا مشيعين....
وجم رزاق حيد اليهز الكَاع غدروه غفل ذولي متلثمين....
عمت عين الموت الياخذ الابطال ويختار وين الزين....
جم جاسم يضحك للهوا حلو ومزيون شو صبح ويه الميتين....
جم ام ربت ولولت واكسرت ظهرهه الضنه يمه وياشوفت العين....
جم تونه من اجاهه الرصاص لموتته
اهتز الكون وانكلبت موازين....
جم خوله ظلت مكسوره ظهر ودم تجري العين....
شلون تنسه وشنهو التنساه ومنين الصبر يالله منين....
موذني الشرايط وهدومها الحلوات وامهه تحاجي اللعابه تونه وين..
عمت عين الرصاص الياخذ الشبان ويترس جسمهم كومه نياشين..
وهجم بيته اسوه بينه الموت يختار البطل والوينه وين....
انهجم بيته اشلعب بينه الموت بعمر الورد للمكابر زفينه الحلوين...
عمي ردونه لايام العوز بطلنه رجعونه لبيوت الطين....
بالعافيه عليكم كل القصور كل الكراسي صيروا سلاطين....
اخذوا الجنه الكم مو شفنه جهنم منكم والله متبرين....
اغنياء احنه ابفقرنه.ابمحبتنه.يابه شكثر طيبين....
امرنه لله والواحد القهار مكتوبه انكول اعله الجبين....
وماظل مكان الينكتب بيه انترست الكصه وانكتب مرتين....
يارب دخيلك مو كافي خلصت الناس يارب العالمين....
اكلوبنه لابسه اهدوم السود بالحياه اندفنه واحنه عدلين....
عليمن نبجي عالبقوا .عالراحوا.عالضلوا.اضنهم ماشين...
عليمن نبجي على انفسنا على الراح عالجاي والله صرنه متيهين..
دهوك..آذار..2007
الثلاثاء يونيو 03, 2008 1:31 am
